Puso Ni Ayat

by: Rosalie Barnachea

Aldaw dagiti puso

Naimpapuswan nga kablaaw ko

Naragsak nga aldaw tayo

sapayla kuma ta umapay ayat ko.

Aldaw nga aglabas

Di tay masbaalan rumsua ni ayat

Idardarirag na panagayat

Kadagiti amin nga daksanggasat.

Naemma nga puso

Balunen na ragsak nga ipaay to

Ayat nga salsalimetmetan

Iti uray asino.

Agyamannak kakapagayan

Panangpasangbay pagtaengan

Umaykula iyarakop man

Panangkablaaw nga naimpapuswan.

I Love You Daddy

by: Jane Boadilla-Galut

Maysaak nga anak a dina maibalikas

I love you daddy ti amak a managayat

Ta dimakkelnak a sibubuteng ken amak

A diak met ammo no apay kabsat.

Nariknak ti ayat mo daddy ngem siak

Kurang nak iti wagas no kasanok

Iparikna ayat ko kenka a kas amak

Umapal nak amma ken annak a aglinnang-ay.

Ta dita sibay mo diak napadasan

Ngem iti tao a bumaryo inka inpaay

Kas ama ti barangay nga inka nagserbyan

Kinse a tawen daddy inka pinagserbi sidong bumaryo agraman umili.

Dakami nga annakmo inkan sa man inpasuli

Riknam nga ayat inkan sa man inlemmeng kadakami

Ngem ita maawatan kan daddy ket kayatko

Man nga ibaga ay-ayaten ka, i love you daddy.

Umadanin awidko sibaymo innak

Ibalikas i love you ta addaka pay a biag

Ket sapay koma ta maawatannak

No apay itak lang nga ibalikas.

Tatang Agawid Kan

by: Eduardo Benavidez

Nabayagkan nga adda dita sabali a pagilian

Ubingak pay idi addakan dita

Agingga  ti agdama, trabaho ka latta

Kaanoka kadi a saanen nga agsubli dita?

Adun ti napalabas a Paskua ken Baro a Tawen nga awanka

Kasta met panagkasangaymi ken panaggradwar nga awan ti denna

Nagkallaysa kamin ni anniniwanmo awan makita

Adun a panagtitiponmi uray naminsan awanka.

Itan ta addan trabahomi pangalaan pagbiag

Agawidkan aginanakan, Tatang

Nabannogen ti bagim ditoy kan nga agidda

Tapno ti salun-atmo inkam maaywanan.

Kadwaem  laengen ni Nanang

Ramananyo met ti agbiag a naragsak nga agdenna

Subbotenyo dagiti aldaw nga awanka

Aglinnalailo kayo gingga tungpal biag.

Ay-ayatendaka, Tatang

Uray no addaka ti adayo a pagilian

Puso ken panunotmi saandaka a malipatan

Gapu ta sika laeng ti Tatang mi saan a pulos masukatan.

Dakami nga annakyo taripatwendakayo

Kas panangtaripatoyo kadakami ti nabayag a tyempo

Pagserbyandakayo gingga kaykayatyo

Agingga ti maudi nga angesyo.

Mailiwakon kenka, Tatang

Uray no dinakon maubba

Agpinnariknata arakup a nabara

Tatang, agawidkan….

OFW

by: Alberto Biares

Palubusan nak man nga silpoan

Daniw mo a napintas admin reatan

Adda met ofw nga maiyaw awan

Gapuen ti sweldo nga kayat manayunan.

Adda met dagitay pinoy a paliwaweng

No nagtugaw iti sugalan di'm mabagkaten

Darirag ti pudot di da la panpanunoten

Ken pagbayad ni junior iti second semester.

Hustler a manglimlimo ti balay a sugalan

Nagpaabak di damo ta isu't pammarang

Puntos a nadarirag unayen maayayatan

Taya na a two hundred riyals dinoble dan.

Ngem ti agpatnag nga inna panakigasanggasat

Pambaren nan Amin nga kaabay ta isuda ti malas

Sweldo na ti makabulan nga ipatulod no bigat

Naungkawen inabak Tay hustler a damsak.

Din makaturog nga agpanpanunot

No dinno pangalaan iti inna panglitop

Pang enroll ni dayunyor amin naibus

Agraman ni misis awanen igatang pang ardyud.

OFW ILOKANO

by: Eduardo Benavidez

Balikas nga OFW, ipannakkel ti kaadwan

Uray sadino a paset ti lubong inka masarakan

Nadumaduma a lugar ti Pilipinas a naggapwan

Kaadwanna naggapu ti Kailokanuan.

Gapu garud ta maysaak nga OFW nga Ilokano

Palubosannak nga innak idaniw biagmi ditoy daga dagiti Arabo

Mano a tawen ti naglabas kadwa ti rigat ken sakripisyo

Maiyadayo ti pamilya, agawid mabayag a tyempo.

Sakbay a dumteng ti lawag ti agsapa

Masapul nga agriing asikaswen ti bagi nga agmaymaysa

Ta uray no dadduma adda gurigor a marikna

Piliten latta ti sumbrek amangan sweldo kissayanda.

Nalam-ek man wenno napudot ti tyempo

Masapul a sumbrek latta ti trabaho

Aglalo kadakami  tengnga disyerto a nakapwesto

Parmeken ti lam-ek ken pudot a makapadaringungo.

Trabaho ti OFW saan a rabrabak

Dagiti amo saoda a pabugtak

Kaadwanna iyarig ti manok kutak a kutak

Imbes malpas trabaho inda makataktak.

No dadduma sumangpet ti villa naggapu ti trabaho

Gapu ti bannog panagluto saanen a maasikaso

Manglukat laengen ti sardinas wenno manglingta ti itlog a tallo

Wenno agpaburek ti danum suyatan ta noodles dardaras a maluto.

No dumteng ti sweldo bilangen saggaysa

Agipatulod ti kwarta nga insigida

Agur-urayen ti pamilya agduduma a paggastosanda

Mangibati ti sangkabassit para iti bukod a bulsa.

Adu pay ti naduma-duma estorya ti biag ti OFW

Ta no ibaga ditoy a daniwko, saanen makaanay ti espasyo

Addanto gundaway agaramidak nobela para kadatayo

Ibatik garud dagitoy a balikas kadakayo...

“IPANNAKKELKO MAYSAAK NGA OFW ILOKANO”

Ur-urayen Ka

by: Mildred Sagban

Kayatko a gaw-aten ti langit babaen kenka

Tapno mariknak koma pudno a ragsak a kunada

Ngem anian ta ni gasat napaidam kadata

Agsipud ta sika ket addan agtagikua.

Il-iliwek ti agsadag nabaked a barukong mo

Il-iliwek a riknaen managayat a dakulap mo

Il-iiwek nga aprusan rupam a naamo

Idawdawat ko a dumtengto dayta a kanito.

Sika't inpirasyonko iti inaldaw-aldaw

Rigat man nam-ay iti biag ti sumangbay

Gapu kenka diakon marikna da sennaay ken liday

Wen sika ti liwliwa iti biagko a simmangbay.

Tawen man ti aglabas sika't innak urayen

Uray no siakto tay duduuganen

Toy ayatko napudno kayatko inka riknaen

Ur-urayek panagbalin mo a nawaya manen.

Ngem no kas to man bilang siak tay umun-una

Dawatek to iti Ama diay ruangan urayenka

Tapno agkiben tanto kabayatan iseserrekta

Ket kunakto kadakuada daytoy ti inay-ayatko idi idiay daga!

Sika Laeng

by: Eduardo Benavidez

Saankan nga agsangit dungngo

Umayka agsadag ditoy barukongko

Iwalinko dagita nalamuyot a buok mo

Punasak dagita lulwam daytoy panyo.

Isapatak kenka sika laeng innak ayaten

Aginnaddayo ta man, saan agsarak nabayag a panawen

Aginnurayta uray mano a tawen

Laglagipem agsubliakto met laeng.

Uray apagdarikmat a kanito

Ibatik kenka maysa nga agekko

Riknaem ti nabara a panagayatko

Sapay koma ta saanka agbalbaliw dungngo.

Kayatko makita dagita nasam-it nga isem

Saanka a madanagan kanayonkanto a laglagipen

Sika laeng ti innak patpatgen

Urayennak, sakripisyo apagbiit laeng.

IAPA- Nangted ti Liwliwa

by: Marshiel Ta-a

Maysa a page nangted liwliwa

Kaniak ken OFW a pada

Maiyaw-awan amin a sagaba

Nu mkiangaw ka kadakuada.

Didiay ko a nasapulan

Liwliwa, ragsak, respeto ti kaadwan

Ellek a napalalwan

Pakatawa a madi maumaan.

No tulong ti kasapulam

Kaadwan, awan ti ag-saan

Uray da la mapuyatan

Tumulong ti kailokanoan.

No ragsak ti birbirokem

IAPA ti kasapulam gayyem

Rungiit ken nasam-it nga isem

Awan babawim a mapan makilinnangen.

No siak tay agpakatawa

Agrungiit met a ti dadduma

Maayatan da

Kinabagtit nga innak itirtira.

Sika't Arapaap Ko

by: Marshiel Ta-a

(*para ken Ka Mutit)

Diakto mauma nga maingiyebkas iti panagayatko

Nupay ammok nga awan pangsubalit mo

Diak man ninamnama sika't pagpitikan toy puso

Wen sika't pakabuklan ti arapaap ko.

Il-iliwek ti agpasag dita barukong mo

Sapay la koma ta mapasamak to

Nupay ammok addan agtagikua dita puso

Nga isu met pakabuklan ti arapaap mo.

Ibagak kenka awan ti innak maikari

No di laeng daytoy ayatko a nasudi

No kas pagarigan datanto iti aldaw nga maud-udi

Napudno nga ayatko ti kenka mangtagibi.

Adipen nak ti panagayatko kenka

Kuna ti panunot ko sikan ti lipaten na

Ngem toy pusok lumdaang nagan mo ti ibagbagana

Kunana saanto a mauma a mangayat kenka.

Idawdawat ko ngarud iti nasantuan a Kabunian

A sika ken siak ket inna aywanan

Nupay toy pusok ita ket agpaspasanaang

Laglagipen a kanayon, ay-ayaten ka ingganat panungpalan!

I A P A

by: Randy Molano

I A P A dagitoy a letra

A-mintayo ket nagkursonada

P-aayayamna ket inurnosna

A-dtoy amintayo awawisenna.

I-nuran-oras datayo ket agkakaddua

A-wan liday a marikna

P-adapada a nararagsakda

A-mintayo awan maidumduma.

I-ntayo ipaay nsasayaat a kominto

A-gpaay kadagiti amin a tattao

P-agay-ayattayo nga aramiden ti pudno

A-gdidinnungngo dayta ti ipaaytayo.

I-ramantayo dagiti sabsabali a tattao

A-garup millionen ti grupo

P-anangpasardeng ket awan maaramidantayo

A-yat ti kanayon nga iyununatayo.

I-A P A, ipaayna ti nsayaat a panagkakaddua

A-yanayat ti kanayon a makita

P-anamarsua ti DIOS ket nasayaatda

A-dtoy ti IAPA amintayo ket gayyemna.