Sennaay

by: Mildred Sagban

Ragsak ti innak idi narikna

Idi damo ta nga agkita

Inanamaek nga agnanayon dayta

Ngem addan nakitak a nagbaliwan na.

Kayarigam sampaguita nga inay-aywanan mi

Rinibribo kami a kenka nangtagtagibi

Awan ti inkami inlanglangi

Agsipud ta maymaysa ti puli mi.

Ngem itan sennaay ti innak marikna

Ngamin iti naminsan ginamsawan daka

Dayag mo a nadayaw ket dinusak da

Wen adu kami man a naiguyod na.

Nasam-it a langen langen nagbalinen a napait

Katawa idi a nasarangsang itan isem ni ladingit

Saanen nga agtuled panunot idi nasarewawet

Panakaitibkol iti naminsan nagbalinen a baton lagip.

Ita adun ti kapanunutan a rumuar

Ngem awanen daydi dati a segga ken gagar

Adu itan ti agkakasirib nga rumusing

Ngen awan kadakuada da kinapakumbaba ken kinatakneng!

Ayat ng Inabraw (Menu ni Chef Imelda Toledo)

by: Alberto Biares

Napaisem daytoy riknak a nangmatmat

Agduduma a nateng ditoy minuyongak

Pag kettelak sagpaminsan, pag-abrawak

A maidasar a pagsangngoan ken ni Ayat.

Nateng a wagwagen iti anus ni karinyo

Amuoban to met ti kinabanglo ni sip-ayo

A mangagek ti raman ken sam-it ni lailo

Recado 'di nagliway gapuanan ni karayo.

Di'm kinaumaan uray ti ania't a maidasar

Sam-iten ida a kasla ni ayat a pagsangoan

No natam-nay ti raman 'inta daytoy asinan

Ken no ti alsem somobra, 'inta bassit digo-an.

Ngem iti panaglabas ti aldaw ken panawen

Inabraw idi a pagaayat di mo'n kaskas-soen

Siak 'tay madanagan ket maringgoran payen

Amakek nga addan sabalin nga ab-abrawem.

Ingaed ko ketdi ti nagserbi ken nangtaripato

Pagarupek laeng nga nagkurangak iti rekado

Ninayunak pay ti kabaelak tapno naraman to

Inabraw ni ayat a maidasar, imnas agsublinto.

"Ngem ti kinapudno saanen a kenka a mailibak

Ibirokam ti rason tapno inabraw inda malusak

Ta uray no nasam-it ket ibagam nga naap-gad

Apag apaman nga alsem sawem latta a naadat".

Itan panaglabas iti sangapulo ket lima a tawen

Daydi minuyongak a nalangto amin narsaaken

Ayat nga iyab-abrawak, unayen, immalatiwen

Kimma-ruba, nagbirok, iti sabali nga dinengdeng.

Kallaysa?

by:Eduardo Benavidez

Awan makaartap

Pintasmo nagpaiduma

Kawesmo a puraw

Trahe de boda 

Ap-apalan dagiti managuyaw

Kudilmo a napudaw

Libnosmo makaparay-aw.

Inubbaka

Natibker a takyagko

Idanonka ti umokta

Aglinnailota, awan patinggana

Inin-inayadka nga indisso

Ipariknak kenka

Kinapategmo.

Nagsinnabat dagiti mata

Nagkarayam dagiti ramay ti ima

Nangrugi lapayag

Sikigan, barukong, pababa

Gingga puseg…, inwalinmo

Inyarasaas mo, apanka pay banyo.

Diak makaibtor, sinurotka

Naginayadak a kasla pusa

Nakaisem umas-asideg kenka

Anian siddaawko ti naimatangak

Nakangato trahe de boda

Umis-isbo, nakatakderka!

Angaw

by: Jane Galut

Ugali tayon ti umangaw

Ken agpa-angaw

Ti inaramid dayta a mangallilaw

Rikna tayo inna inyaw-awan.

Inaramid na a pinagdrama

Rikna tayo pinalda-ang

Agsasamusak a kararag

Intay inpa-ay.

Ti dayta a kanito diak nalapdan

Luwak nagarubos butig ko immulog

Uraynak la napaspasinglot

Message inbox ko diak sinagsagot.

Tapos maawan met lattan

Tay sakit mo a kunam

Inu-ulbod met gayam

Ulpit mo napalalo

Manangikulbo ka a tao.

Ala nangabak ka siguro ti kunam

Ngem pulos dimonto maalilaw

DIOS AMA a nangbuya kenka

Inaramid mo kanyami a kakabsat mo ida.

Manangallilaw

by: Bregard Galapon

Manglukluko a tao

Awanto turong m0

Ti padam a tao

Ingka nilimlimo.

Sapay kuma ta inka maamiris

Da gandat m0 a kinadakis

Dimo la pinanun0t ti ap-gis

Nga ingka inwallagis.

Ti ikararagmi laengen

Ken apanka la kuma diay sadilangiten

Ta isu met lang

Ti inka kaykayaten.

Ni satanas ti mangagas

Ta sinsinsinan a sakit mo pangas

Sapay kuma ta pumintas

Ta ugalim a NAGALAS.

Sika! Wen Sika Daydiay

by:Mildred Sagban

Ti naminsan ket nagdanggay ta

Ti ammok agpada ta a dua

Ngem gayam naisalsalumina ka

Maysa ka met gayam nga al-alya

Adu ti inta pagpadaan

Kapanunutan ken kapaliiwan

Naminsan adda pay inta binanatan

Kaasi piman daydiay a pagayam

Kunak nakabirukakon ti gayyem ko

Nga ti galad min sa ket agpareho

Ngem anian ta idi agngudo

Sika met gayam tay manglukluko

Wen nagdakes ka man a tao

Kinaimbag ko ania ti insupapak mo

Adu nga tao ti inwalay mo

Ta ipagarup da sika ket pudno

Naragsak ka kadi itan pagayam ko

Naamuamon resulta ti inaramidmo

Ngem dumtengto met ti aldaw mo

Wen saan nga matmaturog ti Apo!

Kailiw Kan Pagayam Ko

by: Mildred Sagban

Nupay bassit a tiempo ti panagpagayam ta

Adda dagiti banbanag a naadal ko kenka

Pangisakit iti mansyon wen agpada ta

Panagaramid ti daniw pareho pay ti format ta

Kunam kaniak iti naminsan ibanat mo latta adingko

Bay-am a mataan dagiti surdo a tattao

Ket inyangaw mo pay kaniak a sikat innak lappedan

Ta amangan mapateltelam ti maysa a pagayam

Kapudot ti BALLA nga isyu idi iti mansyon tayo

Masmasdaawak man ta awan pay comment mo

Simrekak iti inbox mo dinamag ko no ayan mo

Ngem di ka nagreply nakariknaak ti bain kabsat ko

Ket idin ta rimmuar ka sika ti innak inatipa

Kunak pasaway ta manen nga agpadpada

Ngem kunam diak kayat ti agseryoso ita

Ngamin nasakit ti ulok wen nagpaiduma

Ket iti panagpakadam anian a nagkas-ang

Ta ti kinataom dimo pay inparangarang

Siak ken dagiti admin ken dakami aminen

Lumlumdaang kami ta pinanawan na kamin

Ket no sikanton ti kas tay umun-una kabsat ko

Di la mabalin a bisitain nak to iti tagtagainep ko

Iti maudi a gundaway daytoy ti idawdawat ko

Ur-urayen ka kabsat kadagiti sumangbay a tagtagainep ko!

Alutiit

by: Eduardo Benavidez

Lubong ti Facebook inta nagam-ammo

Simbrek ka ti Ilocano Ako Proud Ako

Nabasak ti inka inkomento

Diak a nagduwa-duwa dagus nga in-Like ko.

In-left click ko ti efbi account mo

In-left click ko “Add as Friend” mismo

Iti apagdarikmat, in-accept mo

Umuna a balikas ti chat ta, “musta bro?”

Inyam-ammok ti bagik maysaak nga Admin

Imbagak kaniam prof pic mo artistahin

Insungbatmo “tumalna ka man, wag mo na pansinin”

Dagita nga angaw panaggayyemta nangrugi a nagkibin.

Awan ti rabii a mapalabas nga inta ag-chat

Uray no ibagam aglablabaka wenno aglutlutoka

Ta kastaak met no dadduma a mairana

Ngem saanta latta mabaybay-an ituloy ti panag-chat ta.

Maminsan agkiddawka ag-post nak ti “kuti-utek” wenno “pakatawa”

Ta kunam ma-boring ka dita ayanmo a daga

I-reply ko met kenka, awan mapanunot ko ti agdama

Ket daguska mangted ti pakatawa wenno pagpanunotanda.

Tunggal ag-chat ta, nakaragragsakka

Ngem dimo adda mariknak a nagpaiduma

Diak a ninamnama naibagam palimedmo ket adda

Dinamagko, ngem kunam saanmo pay maibaga.

Naglabas ti adu nga aldaw kasla laeng apagbiit

Naiyanak ti tallo a bagtit – Mutit, Kurarapnit ken Alutiit

Kanayonda apan IAPA, agbitibitin, agpugipugiit

Inda agpakatawa, ellek pumanabsit.

Nagawid ni Kurarapnit balayna a bassit

Sinapulna ni Mutit adda laeng dita igid

Ni Kurarapnit, tangad a tangad, saan a makatalna agsangit

Ta dinan mabirokan gayyemna nga Alutiit.

Tabungaw a Bugbugtong

by: Alberto Biares

Dua bukel nga insugot ko di naminsan

Rusing rimmuaren siak tay maragsakan

Ngem diay puon maysa laeng ti timmangar

Masdaawak ta dua bukel ti inna naggapuan.

Nadaras kano ti tabungaw a lumangto

No nalamiis ti ima a mangtaripato

Dayta ti inyadal ni ilong ko nga ikko

Nagpada sakanan addan diay kamposanto.

Naglabas diak binilangen ti aldaw

Nagpitilen tay mulak a tabungaw

Bunga a bugbugtong innak salwadan

Amakek a makkriit bungolan ti kagaw.

Pugsit ti danum tabungaw nagwasnay

Kariwawet nga uggot na mayat agaabay

No adda aglabas makakita makakatay

Isem ko, apal da mariknak napalalo unay.

Tabungaw ko nasirip ni Baket Ampiang

Unay mulagat ta mata masmasdaaw

Pakkang a saka na di na payen maiyakkaw

Am-ammalan na a tabako inna payen nangalngal.

 Alberto Biares

by: Alberto Biares

Uliteg ni Tungaw, anak ti kuyam-kuyam

Timel a tayanggutaw, nalawa inka nagarsaban

Kinagat mo nagramaram, sobsob a dara-daran

Unayen panagkinnit, di ka pay la koma magusingan

Madama ti urok, immay ka dimmukog

Sapin naiwagsak, kimleb ka ditoy kimmot

Sikan tay nabisinan, darak inka sinusop

Unayen a gatel, uray ko la naipug-aw toy uttot

Rinabii a puyatennak, timel a palangguad

Kanayunek ti agkudkud, atiw ko payen tay agkurad

Maipos kan to laeng, puon ti kamatis inka iyablat

Bareng umirot turog, gapuanak a makamukat

Kamat-kamaten ka, uray dinno paglemmengam

Lumsot ka uneg anguyob, wenno sirok ti dalikan

Kuyam-kuyam a pamilyam, ampas inka pagkamangan

Rapun-rapunen kay amin, a tupakan ti tagaang

Sino aya ti di magatelan, kadagita kittab mo?

Namsaakam a binatlag, gutol-gutolen toy patong ko

Sutil ka a TIMEL, sino ak aya ti panangipagarup mo?

Siak ni Berto a tao, saanak nga aggud-gud nga aso!

Panagpakada

by: Larry Garcia Miravel

Sumagmamano pay a bulong kalendaryo ti bilangen

Maysa a paset ti biagko innakto rikpanen

Agpakadaakon dungngo, dika aglulua

Agkitatanto manen, karik dayta kenka.

Naulpit a lubong dagiti masirib ken sutil

Innakon panawankan, saanak a martir

Adu a pananglala-is mo toy numo

Nasakit nakem ken nadagsen barukongko.

Agyamanak kadakayo puli ti Ilokano

Ragsak ken liwliwa nga intedyo

Sadiay papanak , itugotko

Pakalaglagipan kapagayam a pudno.

Umayen ti kanito madardarepdepko

Nakalukaten ruangan ti balay a dagusko

Gamin inyawat dan korona ti AGBALLA

Mapanakon diay balay: MENTAL HOSPITAL ti naganna!

Kararaf Para Ti IAPA (2011)

by: Larry Garcia Miravel

Amami a Mannakabalin

Umaykami agrukbab ken agparintumeng

Amin a tao agtamed kenka

Kangrunaan annakmo a taga-IAPA

Agyaman kami intedmo a parabor ti 2010

Ken kasta met agdawat kami manen

Dayta awan ressat nga ayatmo

Kibin ken taklin mi iti daytoy tawen a baro

Ikararagmi Apo a patibkerem pay

Daytoy IAPA nga imbilang mi a balay

Isuronakami a mangawat biddut mi

Ken mangatur killo a galad mi

Idalannakami umno a dana

Sika't sanggir mi ken namnama

Ayat, Rang-ay ken Kappia

Dawatmi para ti tunggal maysa

O Apo mi a Namarsua

Baro a tawen, baro a nam-nama

Mannakabalinka ti amin a banag

Pannarabaymo inka kadi iyetnag

Wen tao kami a managbasol ken nakapsot

Dawatmi pammakawan mo a di agressat

Sabatenmi ngarud tawen 2011

A Sika ti adda toy Puso mi ken nakem.

AMEN

Kanyobong ni Berto

by: Alberto Biares

Adda pay la riwriwet na, siak nabaringkuas

Uray naata ti turog, matak nagmulagat

Mapankon pukanen, kawayan diay ansad

Para kanyobong, baro tawen a pangsabat

Kinirog a bagas, kape naigopen

Badang naisabbikel, uray no muddel

Maganasan met piman, nga inna tagbaten

Lakay a putek, nagkillo natangken

Pinilik langilangan, ta amakek no maparpar

Ta dinto ket suyot, wenno agbanarbar

Sinalingsingak burarawit, siit a nakatangar

Kumarantingak, baro tawen unayen ta gagar

Impakat kon ti adal a kina inhinyero

Masapul masurot amin a nakai plano

Uray kanyobong, rebbeng na a precisiyo

Bareng dakes nga ispirito, ida makigtot ko

Ti karantiway, kaatiddog na apagapaman

Nalussok payen amin a buko buko nan

Aganit-it toy kotokot, abot a pagpasgedan

Laengen ti kurang, de gas a pagsilawan

Kalboro a natukel, pagpaloom ti mangga

Apagiso a sumrek dita sungaban na

Masapul a mapadas sakbay ti kaissoan na

Ta didak ket katawaan no kasla uttot ti uni na

Tedted ti danum, apoy naisunelen

Nagkanalboong, daga nagarigengen

Upa a mangokop, itlog napissaanen

Kubbo a takung, nagunnat nag kiad payen

Pangkis nga aso, mata na nagsimpa

Manok a tukong, timmangaren ta ipos na

Alutiit a nagsaltek, din nagsubli ta panga

Kurarapnit a balinsuek, naisboan nan ta rupa

Uray siak, matak unayen a mulagat

Diak patien, naipug-aw payen ta mukat

Ikkis, pukkaw ken iryag diak ida impangag

Unayen nagkasdaaw, lapayag kon nagsullat

AMPON KA KADI TI IAPA?

by: Mildred Sagban

Adda mansyon a simrekak

Agduduma ti innak nasarak

Adda naladingit adda met naragsak

Adda nasingpet adda met nadamsak

Pagamuan simrek iti panunot ko

Ania a klase dagitoy a tattao

Saanda aya kadi amin nga ilocano

Apay nga adda rummuar madi nga sao?

Binisitak dagiti mangiturturong da

Natakneng met dagita itsuraen da

Apay nga adda rumuar a naisalsalumina

Wenno ampon da laeng dagita?

Ti maysa pay a diak maawatan

Ti dadduma ibaba pay kapanunutam

Apay dida kadi aya maawatan

Saantayo nga agpapada a nagaladan

Adda pay sumrek a kunam la no sino

No agsao ket kasla isuna ti pudpudno

Makitana amin nga irrado

Ta gayam espiya sa ti sabali a grupo

Dagiti admin yo,saanyo kadi a makita ti rigatda

Ti sakripisyo da nga awan baybayadna

Kayatda laeng mangted ti liwliwwa

Kadagiti rinibribo a puso nga aglulua

Admins saludunak kadakayo

Nupay saan tayo amin nga agaammo

Naynayunan yo pay kadi ti anusyo

Ngamin ammok adu pay ti ampon nga surdo!