Kanyobong ni Berto

by: Alberto Biares

Adda pay la riwriwet na, siak nabaringkuas

Uray naata ti turog, matak nagmulagat

Mapankon pukanen, kawayan diay ansad

Para kanyobong, baro tawen a pangsabat

Kinirog a bagas, kape naigopen

Badang naisabbikel, uray no muddel

Maganasan met piman, nga inna tagbaten

Lakay a putek, nagkillo natangken

Pinilik langilangan, ta amakek no maparpar

Ta dinto ket suyot, wenno agbanarbar

Sinalingsingak burarawit, siit a nakatangar

Kumarantingak, baro tawen unayen ta gagar

Impakat kon ti adal a kina inhinyero

Masapul masurot amin a nakai plano

Uray kanyobong, rebbeng na a precisiyo

Bareng dakes nga ispirito, ida makigtot ko

Ti karantiway, kaatiddog na apagapaman

Nalussok payen amin a buko buko nan

Aganit-it toy kotokot, abot a pagpasgedan

Laengen ti kurang, de gas a pagsilawan

Kalboro a natukel, pagpaloom ti mangga

Apagiso a sumrek dita sungaban na

Masapul a mapadas sakbay ti kaissoan na

Ta didak ket katawaan no kasla uttot ti uni na

Tedted ti danum, apoy naisunelen

Nagkanalboong, daga nagarigengen

Upa a mangokop, itlog napissaanen

Kubbo a takung, nagunnat nag kiad payen

Pangkis nga aso, mata na nagsimpa

Manok a tukong, timmangaren ta ipos na

Alutiit a nagsaltek, din nagsubli ta panga

Kurarapnit a balinsuek, naisboan nan ta rupa

Uray siak, matak unayen a mulagat

Diak patien, naipug-aw payen ta mukat

Ikkis, pukkaw ken iryag diak ida impangag

Unayen nagkasdaaw, lapayag kon nagsullat