"Sutil ken Nataer"

by: Alberto Biares

Mil nueve sientos setenta'y uno

Masya a pagayam immakar ditoy barrio

Naggapo iti Santa, San Jose met toy numo

Nataer nga ubing a kasla manglimlimo.

Greyd tri tayo damo ka a makita

Ni Sutil no di mariro ket kiros ka

Managbabain agmalla- mallanga

A kunam la no tiptipden na ti isbo na.

Uray no Sutil ammo na ti umarayat

Segga ti gayyem nga agpaarayat

Babassit a dakulap nagsinnabat

Nagsaringgayad ti isem a napartuat.

Naglabas ti bulan Ken tawen

Nasinged dan nga aggayyem

Awan aglangan ayam ket dumteng

Dita krosing, no rabii bulan kabusen.

Greyd 5 ta idi iti diak malipatan

Maestra a baket nasuron ti panagbasam

Panagbasaan dilam agbiddal- biddal

Nakiddis na ka, libro naikalkag kenkan.

Hi-skul Sutil ken Nataer agtaraoken

Agpinnaapal ti pantalon a pansoten

Pinnalawa ti gayadan maisagad payen

Nam-ay ti kalsada, rigat met labaen.

Kinataer mo babbai magargari

Nadekket da ta sika ket natagari

Ni Sutil umis isem laeng dita suli

Unay sakuntip ngem iso ti deadly.

Oras ti eksamen apan ka diay sango

Dinak kaabay, mapanak likud mo

Tumanabutob ka no apay diak nagreview

Ti kunam agsakarak? Ti wrong ta agparis to.

Adu a kalokoan ti inta napadasan

Oras ti klase isung-song ta ti kaaduan

Mapan tayo diay karayan agaguyan

Pati maestro a nasingpet, mairamraman.

Rabbi a nasellag mapantayo agtapat

Natambaan ti niyog gin a nai-shot

Damo pay a kantam manok agkutak

Sumipplag ta upa, itlog na ig-iggamak.

Laeng kina ubing, kina baru naipalagip

Pangngaasim gyem dika agsakuntip

No adda mainayon mo inka met ikur-it

Sagawisiwam, kumape, dita utek sumrek.

Manun a tawen iti dimmanun naglabasen

Sika pay laeng tay nasinged a gayyem

Lumakaytan, buok ni Sutil pumurawen

Nataer nangisit pay laeng ngem pangalboen.