by: Alberto Biares
Ti paskua sumangbay manen
Awan latta tay kepkep nga ur-urayen
Tay prince charming ko a dumteng
Datsanggasat nailaneb sa manen
Napintasak met ti panagkunak
Seksi, napudaw ken nasingpetak
Ngem apayen awan latta agrukbab
Di met mauyaw ti adda a galad
Idi naminsan adda nagpasagid
Toy pusok unayen ta nagkulagtit
Rinabii kanayon innak sumirsirip
Picture profile na a naipagkit
Ngem unayen anian a sanaang
Toy barukong ko kasla nasneban
Prince charming naasawaan met gayam
Todas, arapaap awanen nalappedan
Adda met nataraki dita a babbaro
Toy pusok di met kaniada kumarayo
Naawagak payen amin a sasanto
Sapay koma toy kararag ipangag yo
Wish ko koma Iti daytoy a paskua
Kasimpungalan koma sumanglad ka
Bareng mananam ti kepkep a kunada
Ta diak pay narikna no kasano ti pudot na
Ngem no awan latta a mapasangpet
Bulan to manen siguro ti bilangek
Anusak manen toy pungan ko a kakinnepkep
A mangep-ep ti paskuak a nalam-ek
No comments:
Post a Comment