Nagkas-ang a Biag

by: Albeerto Biares

(for A.V.H. Singapore)

Pinasingkedam iti kari ken sapata

Inkarim kaniak a dinak to pulos iwawa

Singsing a regalo isu't tanda

A ni la patay kadata pakapagsina

Nagurayak iti sangapulo a tawen

Tay karim a kasar dita altar dumteng

Bunga ni ayat-ayat 14 anyosen

Nagdinna ta laksid ti pirgis a papel

Sinangal ta ti adu nga arapaap

Salbaren ti rigat a nakaduyat- yat

Agdadata a biag masibugan sumalukag

A diak ninamnama a sabali ti maisubad

Nasakit ti nakem ko nga umadayo

Trabaho ballasiw taaw impagel mo

Nakurapay a panagbiag iso nangirubo

Ti gandat ko rigat ti biag mapnoan to

Hongkong nga agdindinamag iti natupar

Dam-eg ti daga apag apaman nabasan

Sukat ti sayangguseng sika kano let addaan

Sabali a mula nga inka sibsibugan

Damdamag diak ida ingkaskaso

Imbes inggaed ko ketdi ti nagtrabaho

Ti ammok amin dagita ket parparato

Talek ko, ayat mo iso ti pudoudno

Unayen angaw ni gasat di pagintutulengan

Nagawidak a di mo napakpakadaan 

Balay ta a naputar gan ganaetakon piman

Naduktalak a sabali metten ti kakaiddam

Kibbayog toy barukong ko kasla marba

Toy pusok kasla natugkelan natirad a daga

Anian a saem ti inka inparikna

Dungngo Ken ayat ginudas mo ida

Impariknamon a kayat mo ti gumarot

Karim ken sapatam inkan ida pinag-ut

Langit ken daga kaniak naisallukob

Luak ken pakaasi saan na kan maigalut

Manun a tawen ditoy pusok maiparipirip

Tugot ti napalabas kaniak maipalagip

Diak malappedan agsangit no agdagullit

Paskua, sapay koma ta ti sumaruno diakton agsangit