Lasbang mo di da maartapan
Kinalasbang inda ap-apalan
Amin malabsam mapatalangkiyaw
Babbaro wenno padam a babbalasang.
Kiday mo a sikkubeng bimmulalayaw
Pingping mo mala rosas a kallidan
Buok nga panguloten pagat-abagam
Matam no perrengen, anges agkul-ayaw.
Kudil mo napudaw pimmorcelana
Siket a kurbada mala coca cola
Ramay mo a atiddog kimmandela
Palikudam, agkinni-kinni no magna.
Dagita nga imnas ket idi kalman
Naglabas ti tawen indan napukaw
Manipud di sikan ti naasawaan
Pintas mo in-inot mo a naliwayan.
Daydi kiday a sikkubeng naglippayen
Kallidan a pingping nalunnitanen
Muging mo agpiligis agkuretreten
Siket korte coca-cola agbuy-ongen.
Ta langam sinarmingam
Sikan tay madanagan
Ni lakay amangan no sumukdal
Ti papaya a darangidangan.
Karetket di mo unay dandanagen
Bumaket di mo unay panunoten
Talek, ipabagim ken lakayen
Dungngo ken ayat dinto umalsem.
Ket no madanunan sika ti agkabaw
Panunot ubing nagsublidan
Saan da kanto pulos a baybay-an
Ni lakay, assibayen na kanto a dalusan.
No comments:
Post a Comment