Kinapudnona diak malapdan ti agluwa
Nga irugi ken iyebkas ti adda a rikna
Maysa a parsua a naiwawa
Nga adayo ti pudno a pamilyana.
Agyamanak unay kenka, gayyem
Iti inka manen panagipatangatang
Lagip dagiti panawen a naglabas
Naandingay ti pusok, nakarikna’t ragsak.
Saludo-ak kenka, ta malagipmo pay la amin dagita
Ta no siak ti damagem, adu ti kayatko a lipaten
Nakas-ang ti biagko idi a panawen
Ngem agyamanak ta addaka latta maysa a pudno a gayyem.
Agurayka, palubosannak met ipalagip kenka
Dagiti kolokwan nga inar-aramidta
Ta saan laeng a sika ti mangipalagip kadagita
Ta no saggaysaenta, saanen a daniw no di ketdi nobela.
Malagip mo pay ngata?
Saba a palpaluomen idiay abay ti simbaan
Daydi a malem nga aginnagaw sipnget ken lawag
Intay tinagbat, taray bwatit, inpaluom ngem daksanggasat tinakawda met.
Manok a taraken ti kaarruba
Daytoy a gayyem, napanna pinalsi-itan
Unget ti akin-manok, tay rupa limabbasit
Naustel tay manok, nagkuripaspas apagbi-it.
Panawen ti Paskua, nalam-ek, naimeng ti maturog ti kalapaw
Immulika ti niyog, binuras mo ti duwa
Nanabtuog da, darasmo bimmaba, kuripas a nagtataray
Ubbogna pagtimpla ti gin, pagpapudot ti rikna.
Pudno, pudno..idi hi skul ta, nalaingka agkanta
Agar-aruyot ti kinataraki, nalaing pay aggitara
Manipud ayat, inggana kurimatmat
Sagot dagiti kanta, babbalasang umarak, imasda kasla abal-abal a ginisa.
Kenka gayyemko a Sutil, nagpaiduma a kinataraki
No ayat ti pakasaritaan, kurengrengem dayta gitaram
Igiddan mo met ti umuttot ken agsagawisiw, uni da a nagpada
Babbalasang ti away, umasidegda aggiwagiw patpatongda.
Uray pay dinto lumnek ni apo init
Wenno dinto makauni dagiti alutiit
Uray pay kilikilim bumangsit
Gayyemka latta, innak ipapilit.
Agkurad man dagiti ka-batch da
Uray aggaddil pay pati sellangda
Daytoy ti inka tantandaanan
Gayyem ka latta, inggat tungpal tanem!
Ala ngaruden dika agkulkulagtit
Lagipem a rabii ti panagruar ti alutiit
Uray karasakas dagiti kurarapnit
Ikarik kenka, agkitatan to ti mabiit.
No comments:
Post a Comment